Så langt i 2026 har kommunen fordelt i overkant av 2,7 millionar kroner i kulturmidlar og prosjektmidlar til aktivitet og trivsel – midlar som bidreg til å skape liv, inkludering og gode møteplassar i heile kommunen.
Frivilligheita skaper aktivitet, fellesskap og trivsel
Tysvær kommune har ei sterk og mangfaldig frivilligheit, og kvart år bidreg kommunen med økonomisk støtte for å leggje til rette for aktivitet, engasjement og fellesskap. Midlane blir fordelte etter fastsette kriterium og skal støtte opp under både drift, aktivitet og utviklingsprosjekt i frivillige organisasjonar.
Med tildelingane for 2026 går i overkant av 2,7 millionar kroner til frivillige lag og foreiningar som kvar dag gjer ein viktig innsats for barn, unge, vaksne og eldre i Tysvær.
Kulturmidlar – aktivitet for barn, unge og personar med nedsett funksjonsevne
Gjennom ordninga kulturmidlar gir kommunen støtte til frivillige organisasjonar som driver aktivitet for barn og ungdom opp til 19 år, samt til organisasjonar som tilbyr aktivitet for menneske med nedsett funksjonsevne, uavhengig av alder.
Midlane kan også nyttast til drift av forsamlingshus og tilskot til løn/tilsette i organisasjonar der dette er ein føresetnad for aktiviteten.
I 2026 er det over 30 organisasjonar som har fått tildelt kulturmidlar. Tildelingane går mellom anna til idrettslag, korps, speidargrupper, ungdomslag, kultur- og friluftsorganisasjonar og lag som skaper lågterskeltilbod og møteplassar i lokalmiljøa.
Prosjektmidlar Aktivitet og trivsel – støtte til gode initiativ
I tillegg er det delt ut prosjektmidlar gjennom ordninga Aktivitet og trivsel. For våren 2026 er det fordelt 105 000 kroner, og interessa har vore stor. Det kom inn søknader for godt over 300 000 kroner, med mange gode og kreative prosjektidéar.
Til saman fekk 21 organisasjonar støtte denne våren. Prosjekta spenner vidt og omfattar mellom anna:
- sosiale møteplassar og inkluderande arrangement
- friluftsliv og lågterskel aktivitet for ulike aldersgrupper
- kultur- og nærmiljøtiltak
- aktivitet retta mot eldre, personar med nedsett funksjonsevne og andre grupper
Ny utlysing av prosjektmidlar Aktivitet og trivsel vil kome hausten 2026.
Investeringstilskot til kulturanlegg før sommaren
Tysvær kommune vil også minne om at tildeling i ordninga investeringstilskot til kulturanlegg vil skje før sommarferien.
Gjennom desse ordningane ønskjer Tysvær kommune å støtte opp under den viktige innsatsen frivilligheita legg ned, og bidra til at kommunen held fram med å vere ein aktiv, inkluderande og levande stad å bu.